स्विस बँकांमधील ठेवींत पाकची सरशी

स्वित्झर्लंडच्या बँकांमधील गुप्ततेची भिंत फोडण्यात भारताला यश येत असल्याने सलग दुसऱ्या वर्षी या बँकांमधील भारतीयांच्या ठेवी घसरल्या आहेत. गेल्या वर्षीच्या तुलनेत स्विस बँकांतील भारतीयांच्या ठेवींत एक तृतीयांशने घट झाली असून, सध्या हा आकडा १ अब्ज २० कोटी स्विस फ्रँक म्हणजेच ८३९२ कोटी रुपयांवर आला आहे. काळ्या पैशांवरून राजकारण तापण्यास सुरुवात झाल्यानंतर स्विस बँकांमधील भारतीयांच्या ठेवींची

माहिती देण्यासाठी स्वित्झर्लंड सरकारशी केंद्र सरकार सातत्याने वाटाघाटी करीत आहे. त्यामुळे सन २००६मध्ये २३ हजार कोटी रु. असलेल्या या ठेवी त्यानंतर केवळ सन २०११ (१२ टक्के वाढ) व २०१३चा (४२ टक्के वाढ) अपवाद वगळता सातत्याने घसरत आहेत. सन २०१४च्या तुलनेत २०१५च्या अखेरपर्यंत यामध्ये ५ अब्ज ९६ कोटी फ्रँकची म्हणजे ३३ टक्के घट झाल्याची माहिती गुरुवारी स्विस नॅशनल बँकेने जाहीर केली. सन २०१४च्या अखेरपर्यंत भारतीयांनी स्विस बँकांमध्ये १ अब्ज ७७ कोटी ६० लाख फ्रँकची थेट गुंतवणूक केली होती. ती आता १ अब्ज २० कोटींपर्यंत कमी झाली आहे. तर विविध त्रयस्थ आर्थिक व्यवस्थापन करणाऱ्या कंपन्यांमार्फत झालेली गुंतवणूक ३ कोटी ७९ लाख फ्रँकवरून १ कोटी ८ लाख फ्रँकपर्यंत घसरली आहे.

पाकने मागे टाकले

कायद्याच्या बडग्यामुळे स्विस बँकांतील भारतीयांच्या 'सुरक्षित' ठेवींमध्ये घट होत असताना पाकिस्तानी नागरिकांच्या ठेवी मात्र १६ टक्के म्हणजे १० हजार कोटी रुपयांपर्यंत वाढल्या आहेत. गेल्या दोन वर्षांतील ही सलग दुसरी वाढ आहे. त्याचवेळी चिनी नागरिकांच्या स्विस ठेवींत मात्र ८ अब्ज १६ कोटी फ्रँकवरून ७ अब्ज ४० कोटी फ्रँकपर्यंत घट झाली आहे.