इतिहास संशोधक रा. चिं. ढेरे यांचं निधन

ज्येष्ठ साहित्यिक, विचारवंत व प्रख्यात इतिहास संशोधक रामचंद्र चिंतामण तथा रा. चिं. ढेरे यांचं आज पुण्यातील राहत्या घरी दीर्घ आजारानं निधन झालं. ते ८७ वर्षांचे होते. ढेरे यांच्या निधनानं नव्या पिढीला इतिहासाशी जोडणारा महत्त्वाचा दुवा निखळल्याची भावना व्यक्त होत आहे. महाराष्ट्र साहित्य परिषदेच्या कार्यालयात दुपारी साडेअकरा वाजता ढेरे यांचे पार्थिव अंत्यदर्शनासाठी ठेवले जाणार आहे. त्यानंतर वैकुंठ

स्मशानभूमीत दुपारी १२ वाजता त्यांच्यावर अंत्यसंस्कार करण्यात येतील. डॉ. ढेरे यांच्यामागे मुलगा मिलिंद, लेखिका डॉ. अरुणा ढेरे व वर्षा गजेंद्रगडकर या दोन कन्या आहेत.

संत साहित्याचे गाढे अभ्यासक असलेल्या ढेरे यांचं इतिहास व प्राच्यविद्या संशोधनात मोलाचं योगदान होतं. साहित्य व संशोधनाचं काम करतानाच त्यांनी सामाजिक बांधिलकीही जपली होती. या बांधिलकीतूनच त्यांनी त्यांच्याकडील पुस्तकांचा संग्रह ट्रस्टच्या माध्यमातून समाजासाठी खुला करण्याचं त्यांनी ठरवलं होतं. त्या संग्रहामध्ये इतिहास, संत साहित्य, जुने मराठी वाङ्मय, लोकसाहित्य, लोकसंस्कृती अशा वेगवेगळ्या विषयांवरील पुस्तके आहेत. मराठी संस्कृतीचा गेल्या १० शतकांचा इतिहास ढेरे यांच्या ग्रंथात समाविष्ट आहे. देश-विदेशातील अनेक अभ्यासकांनी डॉ. ढेरे यांच्या मार्गदर्शनाखाली संशोधन केलं होतं. त्यांच्या संशोधनाचे संदर्भ जगभरातील संशोधकांना मिळावेत यासाठी नुकतीच www.rcdhere.com ही वेबसाइटही सुरू करण्यात आली आहे. 'श्री विठ्ठल : एक महासमन्वय' या ग्रंथासाठी १९८७ साली त्यांना साहित्य अकादमी पुरस्कारानं गौरवण्यात आलं होतं.