क्षेपणास्त्राची यशस्वी चाचणी

जमिनीवरून हवेत मारा करणाऱ्या नव्या क्षेपणास्त्राची भारताने गुरुवारी यशस्वी चाचणी घेतली. मध्यम पल्ल्याचे हे क्षेपणास्त्र भारताने इस्रायलच्या सहकार्याने विकसित केले आहे. ओडिशाजवळच्या चंडीपूर येथील एकात्मिक चाचणी तळावर मोबाइल लाँचरच्या साह्याने हे क्षेपणास्त्र सकाळी सव्वाआठच्या सुमारास डागण्यात आले. 'ही चाचणी अत्यंत यशस्वी झाली. क्षेपणास्त्राने लक्ष्याचा अचूक वेध घेतला,' अशी माहिती संरक्षण

संशोधन आणि विकास संघटनेचे (डीआरडीओ) अधिकाऱ्याने दिली. 'लाँच पॅड तीन'वर सज्ज करण्यात आलेल्या क्षेपणास्त्राला रडारकडून संदेश मिळाल्यानंतर त्याने, बंगालच्या उपसागरावर 'बन्शी' या मानवरहित हवाई वाहनाच्या साह्याने तरंगत असलेल्या लक्ष्याचा अचूक वेध घेतला. पूर्वनियोजनानुसार या क्षेपणास्त्राची चाचणी बुधवारी होणार होती; मात्र काही कारणामुळे ती ऐन वेळी एका दिवसाने पुढे ढकलण्यात आली.

जमिनीवरून हवेत मारा करण्याची क्षमता असलेली १०० क्षेपणास्त्रे दर वर्षी उत्पादित करण्याची सुविधा 'मेसर्स भारत डायनॅमिक्स लिमिटेड'कडे विकसित करण्यात आली आहे.