विकास व मनोज यांना कांस्यपदक

ऑलिम्पिकचे तिकीट निश्चित केलेल्या विकास कृष्णन (७५ किलो) व मनोज कुमार (६४ किलो) यांना ऑलिम्पिक बॉक्सिंग पात्रता स्पर्धेत कांस्यपदकावर समाधान मानावे लागले. दरम्यान उपांत्य फेरीत पराभवाला सामोरे जावे लागल्याने एल. देवेंद्रो सिंगचे रिओवारी हुकणार आहे. दुखापतीमुळे विकासला तुर्कमेनिस्तानच्या अ‍ॅचिलोव्ह अर्सेलानबेक याच्याविरुद्धच्या लढतीत भाग घेता आला नाही. मनोजला युरोपियन विजेता पॅट मॅकोर्माक या

इंग्लंडच्या खेळाडूने ३-० असे पराभूत केले. भारताच्या सुमित संगवानला ऑलिम्पिकचे तिकीट निश्चित करण्यात अपयश आले. त्याला ८१ किलो गटातील उपांत्यपूर्व फेरीत अग्रमानांकित पेत्र खामुकोव या रशियन खेळाडूविरुद्ध पराभव स्वीकारावा लागला. पेत्रने या गटात सुवर्णपदक मिळविले असते तर सुमितला ऑलिम्पिक प्रवेशाची संधी होती. मात्र पेत्रने उपांत्य फेरीत दुखापतीमुळे भाग घेतला नाही. विकास याला उपांत्यपूर्व फेरीत कोरियाच्या ली दोंगयुआन याच्याविरुद्धच्या लढतीत कपाळावर दुखापत झाली होती. त्याच्या या दुखापतीवर टाके घालावे लागले त्यामुळे तो उपांत्य लढतीत सहभागी झाला नाही. भारतीय संघाच्या प्रवक्त्याने सांगितले, ‘लढतीपूर्वी सकाळी वजन चाचणी व वैद्यकीय तपासणी घेण्यात आली, त्या वेळी वैद्यकीय तज्ज्ञांनी विकास याला विश्रांती घेण्याचा सल्ला दिला. त्याची दुखापत फारशी गंभीर नाही. लवकर तो तंदुरुस्त होईल अशी आशा आहे. भारताच्या शिवा थापाने (५६ किलो) मार्च महिन्यात झालेल्या आशियाई पात्रता स्पर्धेद्वारे ऑलिम्पिकची प्रवेशिका निश्चित केली होती.’ ४९ किलो वजनी गटात स्पेनच्या कार्मोना हेरेडिआ सॅम्युअलने देवेंद्रोवर २-१ अशी मात केली.