स्वीडनची हार, इब्राहिमोव्हिक निवृत्त

रॅडजा नैंगगोलनच्या एकमेव गोलच्या बळावर बेल्जियमने युरो चषक फुटबॉल स्पर्धेत स्वीडनवर मात केली. या विजयासह बेल्जियमने उपउपांत्यपूर्व स्पर्धेत आगेकूच केली. स्वीडनचा संघ पराभूत झाल्याने झाल्टान इब्राहिमोव्हिक विजयासह निवृत्ती घेऊ शकला नाही. यंदाच्या युरो स्पर्धेनंतर निवृत्त होणार असल्याचे इब्राहिमोव्हिकने स्पष्ट केले होते. स्वीडनचे आव्हान संपुष्टात आल्याने हा इब्राहिमोव्हिकचा अखेरचा सामना

ठरला. दरम्यान, इडन हॅझार्डकडून मिळालेल्या क्रॉसच्या बळावर रॅडजाने ८२व्या मिनिटाला सुरेख गोल करत बेल्जियमचे खाते उघडले. उर्वरित वेळेत चेंडूवर नियंत्रण राखत आणि स्वीडनला गोल करण्याची संधी न देता बेल्जियमने विजयावर शिक्कामोर्तब केले. स्वीडनला गटात तिसऱ्या स्थानावर समाधान मानावे लागले आणि आर्यलडविरुद्धच्या सुमार कामगिरीचा त्यांना फटका बसला. पराभव झाल्यास स्पर्धेतील आव्हान संपुष्टात येण्याचा धोका असल्याने पहिल्या सत्रात दोन्ही संघांनी आक्रमक पवित्रा स्वीकारला. स्वीडनच्या मार्कस बर्गने केलेला गोलप्रयत्न बेल्जियमच्या गोलरक्षकाने रोखला. केव्हिन डी ब्रूयानने वारंवार गोलसाठी प्रयत्न केले. इब्राहिमोव्हिकने सहकाऱ्यांसह गोलसाठी पुरेपूर प्रयत्न केले मात्र ते अयशस्वी ठरले. ३४वर्षीय इब्राहिमोव्हिकने स्वीडनचे प्रतिनिधित्व करताना ११६ सामन्यांत ६२ गोल केले. मात्र या युरो स्पर्धेत त्याला एकही गोल करता आला नाही.